Nossa scoula
Allegra e bainvgnieu / bainvgnida illa Scoula cumünela da Samedan!
La Scoula cumünela da Samedan es üna da las pochas scoulas populeras da la Svizra da fuonz sü bilinguas. Da la scoulina fin in nouvevla classa vain praticheda l’immersiun in rumauntsch e tudas-ch. Nossa scoula es mneda e spordscha garanzia da qualited tres evaluaziun interna ed externa.
Inavaunt es ella ün lö da furmaziun vivaint per var 280 scolars e scolaras, ils quêls e las quelas nus accumpagnains cun ingaschamaint e cun cour in lur via d’imprender.
La Scoula cumünela da Samedan consista da la scoulina, scoula primara ed il s-chelin ot.
- Illas trais classas da la scoulina, minchüna cun duos annedas, staun i’l center l’imprender ludic e las prümas experienzas scolasticas.
- La scoula primara, dimena da la 1. fin 6evla classa, intermediescha la savida da basa e promouva ils talents individuels dals scolars e da las scolaras.
- Il s-chelin ot culla 7evla fin 9evla classa vain mno tenor il model C e spordscha a sieus scolars ed a sias scolaras da Samedan, da Schlarigna e da Bever üna preparaziun per l’avegnir, orienteda a la pratcha.
Nossa scoula s’orientescha al Plan d’instrucziun 21 chi drizza si'attenziun sül fundamaint per ün’instrucziun moderna ed orienteda a l’avegnir. Il böt es da promouver las cumpetenzas dals scolars e da las scolaras in möd perdürabel e da als resp. da las preparer optimelmaing per las prataisas da la vita.
Quista pagina d’internet pussibiltescha üna survista detaglieda ed ün’invista interessanta in nos minchadi scolastic. Impü es quist il lö previs per las infurmaziuns pü actuelas da nossa scoula.
Per ulteriuras dumandas u infurmaziuns stains nus gugent a Lur disposiziun.
Bainvgnieus illa Scoula cumünela da Samedan!
Jasmin Koch-Angst & Claudio Giovanoli
Direcziun da scoula