Magistraglia
Ils scolars e las scolaras staun per nus i’l center – cun tuot que ch’els resp. ch'ellas sun e paun dvanter. Nossas persunas d’instrucziun s’ingaschan mincha di cun sapienza professiunela, pazienzcha e sensibilited per la promoziun individuela da mincha iffaunt.
Nus mettains pais sün üna relaziun professiunela transparenta, respunsabla ed amiaivla – saja que in nos team, culs iffaunts ed eir culs genituors.
In nossa granda scoula bilingua instrueschan 33 persunas d’instrucziun cun grond ingaschamaint in scoulina, in scoula primara ed in s-chelin ot. L’adöver consciaint da nossas duos linguas d’instrucziun – rumauntsch e tudas-ch – es per nus üna chosa chi s’inclegia da se e vain vivida in möd natürel ed activ düraunt il minchadi scolastic.
Nos team porta cun se cumpetenzas, experienzas e derivanzas multifaras. Quista diversited vain integreda in noss'instrucziun quotidiana ed ans permetta da sustgnair las scolaras ed ils scolars tenor lur bsögns e da creer ün ambiaint d’imprender stimulant e motivant.
Nus collavurains stret insembel ed ans ingaschains per üna scoula chi’s sviluppa permanentamaing.
Ün accent speciel mettains nus sül adöver e l’integraziun da tecnologias modernas i’l context digitel: ils mezs electronics vegnan integros regulermaing ill’instrucziun e nus ans sviluppains regulermaing i’l sectur da la digitalisaziun.