Chalandamarz
Chalandamarz a Samedan
Stimos genituors
Cheras scolaras e chers scolars
Il ChaIandamarz ed il bal sun occurrenzas obligatoricas. Il cortegi ho lö per regla als 1. marz. Il bal vain festagio il di zieva il cortegi da Chalandamarz, nempe als 2 marz.
1. Tröps
A sun 4 tröps chi giran tres Samedan. Mincha tröp vain mno dad ün mat e dad üna matta. Els occupan las scharschas da sain/saina ubain da chaschier/chaschiera. Mincha tröp consista da var 50 iffaunts.
2. Scharschas
A las giuvenilas ed als giuvenils da las ultimas classas vegnan attribuidas las scharschas tenor data da naschentscha ed ans da scoula passantos a la scoula cumünela. La spartiziun exacta vain fatta culs giuvenils / cullas giuvenilas tenor cunvegna.
Las scharschas:
- sain & saina
- patrun & patruna
- chaschier & chaschiera
- chavals & chavallas
- prüms pesters & prümas pestras
- pesters & pestras
- «vachas» (scolars e scolaras da la scoula primara)
3. Cortegi
– Lö d’inscunter: 06:45 sün plazza da scoula
– Posa da mezdi: ca. da las 12:10 fin las 13:30
– Finischun: ca. a las 16:30 sün plazza da scoula
4. Rösas
Tuot ils scolars e las scolaras faun lur rösas svess a chesa (instrucziun "rösas").
Per dumandas sto la magistraglia gugent a disposiziun.
Per fer la polonesa, vaun il scolars e las scolaras in tschercha d'ün marus, d'üna marusa da Chalandamarz. Mincha pêrin baratta üna rösina scu decoraziun sül vstieu da Chalandamarz.
5. Materiel/vstieus
S-chellas: Tuot ils iffaunts da la 1a fin 6evla classa haun d'organiser svess üna s-chella da Chalandamarz.
Per il cortegi portan ils iffaunts üna blusa blova, ün fazöl cotschen intuorn culöz ed üna chapütscha cotschna cun püschel.
Il vstieu e la s-chella vegnan decoros cullas rösas (vair purtret).
A tuot ils giuvenils e las giuvenilas chi haun üna scharscha (7evla-9evla classa) vegnan ils vstieus ed oter materiel miss a disposiziun da la scoula. Els vegnan infurmos a temp ütil.
Las mattas da l’ultima classa haun dad organiser autonomamaing ün costüm engiadinais per il bal da Chalandamarz.
6. Bal
Il bal ho lö il di zieva il cortegi da Chalandamarz, nempe als 2 marz. La part ufficiela dal bal düra per ils scolars e las scolaras da la primara da las 18:00 fin circa las 22:30, per ils scolars e las scolaras dal s-chelin ot da las 18:00 fin circa las 00:00. Las classas primaras dispêras preparan üna producziun da teater. Il bal cumainza cun quella producziun; zieva sotan ils iffaunts cun musica populera; a la fin da la part ufficiela faun tuot ils iffaunts cun lur marus / marusa da Chalandamarz la polonesa.
Ils iffaunts tiran aint vstieus d'indumengias (vstieus da festa).
L'ustaria vain organiseda quist an da l'EHC Samedan. Ils scolars e las scolaras clappan ün bun per mangiativas e bavrandas.
A partir da las 22:30 güdan ils scolars e las scolaras da las 8evlas classas a fer uorden. Per ils iffaunts da la primara cumainza alura la part facultativa dal bal, inua cha iffaunts e creschieus haun la pussibilted da suter cun musica populera fin circa las 23:30. La bar es avierta eir düraunt la seguonda part da la saira. Eir quista part dal bal, chi glivra intuorn mezzanot, vain conclüta cun üna versiun scurznida da la polonesa.
marz 2026, Cumischiun da Chalandamarz